藝文谷

#309 藝想大世界： 多元共融藝術巡禮 與 Art Basel：廣彩瓷及高級訂製時裝作品《琉璃貫珠》及 Art Central ：互動水墨藝術裝置《白雲觀照》

「藝術三月」節目豐富又多元，今個星期《藝文谷》精選咗以下幾個項目：

Art Basel Hong Kong ─ 巴塞爾藝術展每年於巴塞爾、香港及邁阿密三地舉行，今年參展藝廊中超過半數來自亞太地區，合共邀請來自42個國家與地區240間藝廊參與，其中23間為首次參展。

當中展示咗著名時裝設計師郭培及廣彩國家級非遺傳承人譚廣輝師傅共同創作嘅委約作品《琉璃貫珠》。作品係一件6000片手繪廣彩瓷片被巧妙地製成以金色為主嘅訂製禮服，郭培與譚廣輝會分享創作過程及箇中挑戰。

Art Central Hong Kong ─ 另一個吸引世界各地收藏家、藝術家及藝術好者的盛事。其中有香港藝術家吳觀麟Tony創作互動水墨藝術裝置《白雲觀照》，作品由六十件膠片組成嘅白雲雕塑，每片白雲嘅造型都係手工刻製，並且以數學符號無限「∞」嘅形狀重複排列。Tony 會親述創作理念以及介紹互動嘅部份。

多元共融藝術巡禮 ─ 由勞工及福利局與香港展能藝術會合辦，希望全方位展示展能藝術家卓越嘅藝術才華，以及殘疾人士嘅多樣才能。香港展能藝術會節目聯席主席鄭傳軍會介紹整個項目所包含嘅活動，而展能藝術家盧佩鏞、魏煜鑫會介紹佢哋展場中嘅作品與創作點滴。