#288 香港演藝博覽：琉璃之歌 / 築覺漫遊系列：SANAA (妹島和世、西澤立衛) / 藝在無窮：SANAA 、和平與藝術：南韓DMZ文藝活動 / 大館最新常設展覽《執行法律》及《司法權與懲罰》、香港話劇團 《使命必達》

香港藝術發展局策動嘅「香港演藝博覽」，早前邀請作曲家高世章 Leon籌劃演出，《琉璃之歌》應運而生。

呢個劇場體驗結合視覺藝術、戲劇、音樂及香氛，Leon話可以稱之為「展覽音樂會」。展品係Leon 多年嘅香水樽收藏，配合佢創作嘅音樂娓娓道來人類文明發展嘅故事…..  作品喺香港剛完滿演出，即將移師日本海外首演 ，究竟點樣促成今次合作，假如好快可以再演，Leon 希望做咩調整？


「築覺漫遊系列」 繼續帶大家認識世界各地嘅建築師，欣賞佢哋匠心獨運嘅傑作。今次帶嚟日本SANAA 建築師事務所兩位領頭建築師妹島和世（Sejima Kazuyo）、西澤立衛（Nishizawa Ryūe），佢哋創作咗唔少別樹一格嘅建築，其中金澤21世紀美術館最為人津津樂道。本地建築師洪彬芬Fanny 帶你認識兩位建築風格，再細味兩位嘅傑作，包括：新當代藝術博物館（The New Museum of Contemporary Art）、十和田巿現代美術館。