簡介
Presenter：李秋婷
藝術、文化，蘊藏令生活更豐盛更美好的力量。逢星期六晚出版，一本聽得到的藝文雜誌，帶來不同專題、人物訪問以及最新的藝文資訊。
#香港電台文教組
#藝文一格 culture.rthk.hk
最新
#279「百藝之師：魯班先師廟脊上的《封神榜》」展覽 / 《 穿Kenzo 的女人》音樂劇劇本集 / 藝聞全世界 #61 teamLab
由發展局文物保育專員辦事處及古物古蹟辦事處（古蹟辦）主辦「百藝之師：魯班先師廟脊上的《封神榜》」展覽，展出魯班先師廟經復修後嘅第二進正脊雙面陶塑。廟脊係乜嘢？魯班先師係邊個？魯班先師廟又有咩咁特別？古蹟辦文物保育組考古小組一級助理館長(考古保存) 吳國樑 Ringo 除咗會解答以上問題，仲會話你知點解呢個展覽係一個百年難得嘅機遇。
《 穿Kenzo 的女人》呢個七、八十年代喺《號外》雜誌連載嘅故事，講述女主角中環儷人錢瑪莉同一班好姊妹嘅愛恨情仇、紙醉金迷嘅故事。填詞人岑偉宗Chris十幾年前睇咗呢個作品嘅合訂本，非常喜歡，甚至萌生要將個故事變成音樂劇嘅念頭。音樂劇兩年前搬演舞台，去到今年，佢更加出版咗音樂劇劇本集。Chris以呢部劇本集編著嘅身份，講述創作劇本嘅艱難之處，以及出版劇本集嘅意義，亦會分享文本翻譯成國語版嘅原因，仲會喺節目高歌一曲添。
有興趣嘅朋友記住唔好錯過喇！
重溫
#260 「一山煙雨」展覽 /「圓明園 - 清代皇家園居文化」展覽 / 藝聞全世界 ： 前田悠佑 - 藝在無窮：大英博物館 非洲館 / 理大中華文化節
Presenter：李秋婷
常言道：人生有幾個十年。十年對一個人嚟講，有咩意義？畫家兼網媒記者黃曉楓Apple希望透過最新個展《一山煙雨》，同十年前第一次舉辦個展嘅自己，作出少少對照及回應。今次嘅作品全部都係新作，當中有部份同十年前佢做過嘅一件事有關，到底係咩事？今次展覽嘅名稱、點題作品又同嗰件事有咩關連呢？
講到清代皇家園林圓明園，大家一定會諗起十二獸首，甚至嗰段慘痛嘅歷史，但除此之外，仲有乜嘢鮮為人知嘅故事？香港故宮文化博物館館長吳志華博士透露「圓明園 - 清代皇家園居文化」展覽，有別於以往喺香港舉辦圓明園相關嘅展覽，會較為全面而完整呈現圓明園嘅人與事。到底出入圓明園最常用嘅交通工具係乜嘢？乾隆皇點樣過節慶？今日再睇呢啲同我哋相距甚遠嘅人與事，又有乜嘢得著或反思？
有興趣嘅朋友，記得準時收聽節目喇！
