主持人:李秋婷
藝術、文化,蘊藏令生活更豐盛更美好的力量。逢星期六晚出版,一本聽得到的藝文雜誌,帶來不同專題、人物訪問以及最新的藝文資訊。
#香港電台文教組
#藝文一格 rthk.hk/artitude
喜歡武俠小說嘅朋友,一定聽過古龍嘅名字!佢連同金庸、梁羽生被喻為武俠小說三大宗師。古龍晚期作品亦係代表作之一嘅《英雄無淚》,曾經多次改編成電視劇、電影、漫畫等等。本地畫師Steven Choi蔡景康,最近策動首個古龍武俠繪本計劃,將《英雄無淚》改編成一書三冊嘅作品。到底Steven點樣突破前人建立嘅形象,重新為角色設定造型?喺今次計劃中,又有咩重大挑戰呢?
齊魯文化係山東地域文化,地處黃河下游嘅山東,由新石器時代開始,慢慢孕育出魅力獨特嘅海岱文化。「禮樂和合 探知齊魯—山東文物特展」,展出珍貴嘅山東及香港出土文物,包括玉石器、陶器、銅器及原始樂器,反映新石器時代到明代嘅發展歷程,令觀眾了解中華文明「多元一體」嘅特徵。古物古蹟辦事處二級助理館長 (展覽及宣傳) 胡文立 Sam 將會介紹有趣嘅「亞醜鉞」,以及一套60件嘅戰國銅餐具,到底背後有咩故事呢?
沙頭角位於新界北區,與內地深圳市鹽田區接壤,1951年開始被列為邊境禁區,2022年起陸續開放。喺呢個咁獨特嘅邊境之中,有22幢兩層高,而且有90年歷史嘅樓房,相連組成一列排樓,並命名為新樓街。《共聚新樓街。發現沙頭角》展覽嘅計劃負責人史嘉茵分享到,團隊過去數年透過口述歷史訪談及深入考證歷史文獻等等工作搜集資料,並且邀請五位藝術家以不同嘅藝術手法,呈現沙頭角獨特之美。
「築覺漫遊系列 」建築師洪彬芬 Fanny會帶大家認識十九世紀法籍瑞士裔嘅現代主義建築大師勒·柯比意 (Le Corbusier)。佢嘅貢獻對後世影響深遠,其中日本建築師安藤忠雄亦深受佢影響。聯合國教科文組識世界遺產委員會喺2016年將勒·柯比意設計嘅17個建築作品列入世界文化遺產, Fanny會帶大家由日本去到法國,深入研究其中幾件代表作嘅精妙之處!
主持人:李秋婷
常言道:人生有幾個十年。十年對一個人嚟講,有咩意義?畫家兼網媒記者黃曉楓Apple希望透過最新個展《一山煙雨》,同十年前第一次舉辦個展嘅自己,作出少少對照及回應。今次嘅作品全部都係新作,當中有部份同十年前佢做過嘅一件事有關,到底係咩事?今次展覽嘅名稱、點題作品又同嗰件事有咩關連呢?
講到清代皇家園林圓明園,大家一定會諗起十二獸首,甚至嗰段慘痛嘅歷史,但除此之外,仲有乜嘢鮮為人知嘅故事?香港故宮文化博物館館長吳志華博士透露「圓明園 - 清代皇家園居文化」展覽,有別於以往喺香港舉辦圓明園相關嘅展覽,會較為全面而完整呈現圓明園嘅人與事。到底出入圓明園最常用嘅交通工具係乜嘢?乾隆皇點樣過節慶?今日再睇呢啲同我哋相距甚遠嘅人與事,又有乜嘢得著或反思?
有興趣嘅朋友,記得準時收聽節目喇!